Ardhja e Markut, ja lëvizjet që mund të kryejë prokurorja e re

Kreu i Shoqatës së Avokatëve Penalistë, Saimir Vishaj, gjatë një prononcimi për mediat ka dhënë opinionin dhe vlerësimet e tij për rolin e kryeprokurores së përkohshme të zgjedhur para pak ditësh. Sipas Vishajt, Arta Marku nuk mund të ndërhyjë në emërime e shkarkime. Por megjithatë ai shton se ajo mund të kryejë të gjitha atributet e saj administrative ashtu si i parashikon ligji. Në të njëjtën kohë Vishaj ka folur edhe për drejtuesit e përkohshëm të prokurorive në rrethe.

Ndryshimi i kreut të akuzës ka rikthyer edhe një herë debatin për lëvizje të mundshme në radhët e drejtuesve të prokurorive, të cilët konsiderohen si “të besuarit e Adriatik Llallës”.

Por ndryshimet ligjore kanë reduktuar kompetencat e Prokurorit të Përgjithshëm, i cili sipas Ligjit të Prokurorinë dhe Statusin e Gjyqtarit dhe Prokurorit nuk mund të kryejë lëvizje pa miratimin e prokurorëve.

Disa nga prokuroritë më të mëdha në vend prej kohësh drejtohen nga prokurorë të komanduar, të cilët emërimin e kanë në prokurori të tjera, por edhe lëvizja e tyre do jetë e vështirë për shkak të ndryshimeve ligjore.

Kështu në Nenin 53 të Ligjit për Prokurorinë thuhet se termi “Komandim” ndryshe nga sa parashikohej në ligjin e mëparshëm, tashmë përcaktohet si lëvizje e magjistratëve në një pozicion jo magjistrat në një institucion brenda sistemit të drejtësisë.

Po ashtu, ligji ka përcaktuar një tjetër term për drejtuesit e prokurorive, të cilët tashmë nuk quhen më të komanduar, por të caktuar përkohësisht. Por edhe në këto raste parashikohet se “caktimi i përkohshëm” mund të kryhet vetëm në rastet kur caktohet në pozicione të tjera apo për arsye që parashikohen në ligj.

Por edhe në këto raste është Këshilli i Lartë i Prokurorisë që vendos dhe jo Prokurori i Përgjithshëm. sipas ligjit, kryeprokurori ka vetëm dy kompetenca që mund të ndikojnë tërthorazi në punën e një prokurori të caktuar.

E para ka të bëjë me pezullimin nga detyra të prokurorit në rast të evidentimit të shkeljeve, çka kërkon një procedurë kontrolli apo kryerjen e një akti të rëndë.

Ndërsa lëvizja e dytë ka të bëjë me vlerësimin e punës së prokurorëve, përfshi edhe rivlerësimin kalimtar të punës së tyre dhe konkluzionet në formën e një raporti i përcillen Komisionit të Pavarur të Kualifikimit.

Pra, transferimet, komandimet apo lëvizjet e prokurorëve sipas kompetencave ligjore nuk mund të kryhen nga Prokurori i Përgjithshëm.

Kompetencat e kryeprokurorit sqarohen edhe nga avokati Saimir Visha, i cili thotë se kreu i organit të akuzës as nuk mund të emërojë dhe as nuk mund të komandojë drejtuesit e prokurorive. “Kryeprokurorja Arta Marku nuk mund të emërojë apo shkarkojë, por mund të komandojë në drejtimin e çdo lloj prokurorie të rrethit gjyqësor çdo prokuror me integritet moral dhe profesional”.

Kështu shprehet kreu i Shoqatës së Avokatëve Penalistë, Saimir Vishaj, gjatë një deklarate për mediat lidhur me lëvizjet e mundshme në prokuroritë e rretheve me firmë të Arta Markut.

Vishaj sqaron se sipas ligjit të ri për Prokurorinë, Kryeprokurori i Përgjithshëm edhe pse me mandat të përkohshëm nuk ka rol urdhërues për hetimet apo shfuqizimin e vendimeve, pasi një gjë e tillë i ka kaluar gjykatës.

Sipas tij, Arta Marku në krye të organit të akuzës nuk mund të krijojë institucione të tjera pa u ngritur më parë Këshilli i Lartë i Prokurorisë.

“Kjo Kryeprokurore edhe pse me mandat të përkohshëm nuk mund të emërojë apo shkarkojë, por mund të komandojë në drejtimin e çdo lloj prokurorie të rrethit gjyqësor çdo prokuror me integritet moral dhe profesional. Me ligjin e ri të organizimit të Prokurorisë, Prokurorja e Përgjithshme e Përkohshme është thjesht një administrator dhe nuk ka një rol urdhërues për hetimet apo shfuqizimin e vendimeve, pasi atë e vendos gjykatësi. Por, mandati i Kryeprokurores është procedural, më shumë është një administrator i mirë, se sa një proceduralist i mirë, që do të thotë të urdhërojë hetimin apo pushimin e një çështjeje. Nuk urdhëron prokurorët e sektorëve që të kryejë një veprim të padëshiruar nga prokurori i sektorit”, u shpreh Vishaj.

Prokurorët në rrethe

Sa iu përket drejtuesve të prokurorëve me mandat të përkohshëm, sqaroi ai, është në atributet e kryeprokurorit të përgjithshëm, por ai ngriti shqetësimin se në drejtimin e prokurorive sot ka prokurorë të cilët kanë humbur funksionet e të komanduarit.

“Mandati i këtyre drejtuesve të përkohshëm nuk duhet të kalonte më shumë se 6 muaj, aktualisht kemi drejtues me mandat 2-3−vjeçar që kanë humbur tërësisht funksionet e një të komanduari. Nëse kemi mbi 6 muaj ata duhet të jenë të emëruar. Sot institucioni i emërtesës që është KLP, mungon”.

Pengesë në ngritjen e institucioneve të reja të prokurorisë sipas Vishajt është bërë bllokimi i Këshillit të Lartë të Prokurorisë (KLP).

“Drejtuesja e Prokurorisë së Përgjithshme nuk mund të krijojë institucione të tjera pa u ngritur KLP. Kjo mungesë bën që të kemi vakum në punën e Prokurorisë. Roli i Prokurores së Përgjithshme duhet të jetë zgjedhja e prokurorëve më të mirë, janë 6 prokurorë të cilët pasi të kalojnë Vettingun do jenë pjesë e KLP, bashkë me pesë anëtarët që do vijnë nga Kuvendi. Brenda janar-shkurt duhet të ngrihet KLP, pasi është një ngërç tërësisht i madh. Duhet paralelisht me ligjin e ri procedural të kemi edhe institucionet e reja. Vetëm një dakordësi e subjekteve politike do bëjë të mundur që brenda pranverës të kemi institucionet e reja”, -tha më tej kreu i Shoqatës së Avokatëve Penalistë, Saimir Vishaj.

Shkruar Nga
More from Enton Palushi

Tahiri: Nuk pranoj pranga politike! Alibeaj: Shko pastrohu në gjykatë

Seanca e Këshillit të Mandateve u tensionua ndjeshëm kur avokati i Saimir...
Read More