Cirku Kombëtar, 5 premiera për sezonin artistik në 2017

cirku-kombetar-3

Kalendari artistik i institucionit të Cirkut Kombëtar për vitin 2017 përmban pesë premiera shfaqjesh. Bordi artistik ka miratuar projektet “Arrëthyesi”, “Cirku në sezonin Turistik”, “Milingonat”, “Horizonte” dhe “Dhurata e festave”. “Një vit në një orë” ishte shfaqja premierë e fundit për vitin që lamë, e cila vijon dhe këtë vit deri në kohën që do të vijnë në arenën e Cirkut premierat e reja. “Falenderime dhe përgëzime mjeshtrave dhe artistëve të mrekullueshëm të cirkut tonë, që pambarimisht krijojnë dhe realizojnë për shikuesit tanë të çmuar numra gjithnjë e më bashkëkohorë. Kjo shfaqje e bukur do të vazhdojë të jepet gjatë vitit të ardhshëm të shtunave dhe të dielave në orën 11:00 në një arenë tashmë të ngrohtë dhe mikpritëse”, bënte më dije disa kohë më parë Cirku Kombëtar. Misioni i Cirkut Kombëtar është ruajtja dhe lartësimi i vlerave të veçanta artistike-kulturore të artit të cirkut në vendin tonë, duke u mbështetur në traditat më të mira kombëtare e botërore, për të shërbyer në edukimin, çlodhjen dhe argëtimin e të gjithë brezave. Cirku Shqiptar është një pjesë e pandarë e cirkut botëror. Pionierët e parë të këtij arti në vendin tonë u shfaqën gjatë viteve 1932-’35, kryesisht në fushën e iluzionit dhe të ekuilibrit mbi tel. Në vazhdimësi numri i tyre u rrit dhe profilet ku ata luanin u zgjeruan, duke u pasuruar me numrat akrobatikë, numrat ajrorë, ato me kafshë, kllounatë e xhongleristikë. Në vitin 1959 ata artistë kurajozë e të talentuar realizuan një shfaqje të plotë cirku të titulluar “Shkopi Magjik”. Ky moment i rëndësishëm shënon krijimin e Cirkut Shqiptar, një pjesë e rëndësishme dhe me vlerë e kulturës dhe artit tonë kombëtar. Arti i cirkut në vendin tonë është i pëlqyeshëm nga të gjitha moshat. Nuk ka një skenë, stadium apo shesh në Shqipëri ku artistët akrobatë nuk kanë luajtur dhe nuk kanë shfaqur aftësitë e tyre të rralla artistike. Ata gjithmonë janë duartrokitur dhe brohoritur fuqishëm nga shikuesit e shumtë. Në këtë rrugë të gjatë të rritjes, me vështirësi dhe suksese, artistët dhe drejtuesit e cirkut, këta njerëz që patën kurajon të kultivonin këtë gjini specifike bënë të mundur, që vendi ynë i vogël të kishte një vlerë të veçantë kombëtare artistike e kulturore. Duke filluar nga viti 2012, cirku ynë është njohur si Cirk Kombëtar.

Shkruar Nga
More from Revista User

Horoskopi ditor, e hënë 9 prill 2018

Dashi Pjesa me e madhe e atyre qe jane ne nje lidhje...
Read More