Dhuna ndaj biznesmenit, kompania tërheq investimin 450 mln dollarë

fad-mitriQeveria nuk ka reaguar ende pas këtij lajmi që u përcoll me fotot e biznesmenit në barrela në aeroport, ndërsa opozita akuzoi kryeministrin si fajtor për situatën. OMNIX: Ky akt i rëndë kriminal ia ka dalë që të rrënojë përpjekjet e OMNIX Albania përgjatë këtyre viteve të fundit për ndërtimin e një kompleksi turistik prej 450 milionë USD

Përfaqësuesi zyrtar i kompanisë OMNIX njoftoi dje se pas dhunës së ushtruar ndaj biznesmenit libanez, Fadi Mitri, tërhiqet nga të gjitha investimet në Shqipëri. Sulmi barbar i datës 10 shtator kundër tij dhe familjes është shkak i këtij largimi, njoftoi kompania në një deklaratë për mediat. Qeveria nuk ka reaguar ende pas këtij lajmi që u përcoll me fotot e biznesmenit në barrela në aeroport, ndërsa opozita akuzoi kryeministrin si fajtor për situatën.

“Ky akt i rëndë kriminal ia ka dalë që të rrënojë përpjekjet e OMNIX Albania përgjatë këtyre viteve të fundit për ndërtimin e një kompleksi turistik prej 450 milionë USD në Gjirin e Lalzit.

Ky projekt turistik konsistonte në ndërtimin e hoteli me 5 yje, 370 dhoma me të gjithë elementet e tjerë të një standardi më të lartë, ambiente për shitje dhe dhënie me qira, park ujor, dyqane, bulevard, bare, restorante etj.” – thuhet në reagimin zyrtar të OMNIX.

Ky projekt gjigant do të hapte rreth 1200 vende pune deri në vitin 2018, si dhe do t’i jepte Shqipërisë pamjen e një vendi si destinacion turistik numër 1 në Adriatik dhe Ballkan, është shprehur përfaqësuesi zyrtar i kompanisë. Me këtë investim, OMNIX Albania do të kontribuonte direkt në rritjen ekonomike të Shqipërisë”.

Si konkluzion OMNIX Albania dënon ashpër këtë ngjarje të rëndë kriminale, e cila sjell indinjatë për çdo shqiptar. Duke filluar nga sot, OMNIX Albania tërhiqet nga çdo investim në Republikën e Shqipërisë. “Falënderojmë qeverinë e Shqipërisë për kujdesin ndaj familjes së zotit Fadi Mitri në këtë moment të vështirë për ta”,-  referohet më tej në deklaratën zyrtare të largimit.

Përpjekjet e OMNIX për të investuar në Shqipëri në zonën e Gjirit të Lalzit kanë nisur 8 vite më parë. Por vetëm në vitin 2013, kompania mundi të marrë lejen nga Këshilli i Rregullimit të Territorit për zhvillimin e investimit. Me rotacionin politik të 2013-s, projekti u ngri. Projekti turistik i miratuar vetëm dy muaj më parë në Këshillin Kombëtar të Territorit parashikonte ndërtimin e një resorti gjigant, që do të punësonte rreth 1200 veta deri në vitin 2018. Sipas Omnix, projekti e shndërronte Shqipërinë në një nga destinacionet kryesore turistike në Ballkan dhe do të kontribuonte në rritjen ekonomike të vendit.

Dhjetë ditë më parë, disa persona dhunuan fizikisht presidentin e Omnix Fadi Mitri. Policia ka arrestuar një prej autorëve dhe ka shpallur në kërkim dy të tjerë, ndërkohë që motivi i sulmit dyshohet se ka lidhje pikërisht me investimin e kompanisë në Lalëz dhe pronësinë mbi të.

Kryetari i Partisë Demokratike, Lulzim Basha, deklaroi se “largimi i Omnix Albania është tjetër lajm i keq për vendin tonë”, duke shtuar se “krimi, trafikantët dhe banditët ia dolën ta mbajnë të tyre zhvillimin dhe Shqipërinë”.  “Edi Rama hesht sepse Shqipëria i duhet e varfër dhe e papunë, pasi e ka më të lehtë ta sundojë me banda e trafikantë”, tha Basha.  Rastet e dhunës janë bërë shkaktarë madhorë për largimin e investitorëve nga Shqipëria. Kakomeja është padyshim një nga projektet më të përfolura në Shqipëri. Në fillim u mendua se do të ishte një projekt që do të mbante firmën e Club Med, por kompania u tërhoq nga investimi pak kohë më parë, për shkak të sagës në të cilën kaloi konflikti me banorët vendës për çështjet e pronësisë që shpeshherë u shoqërua me dhunë.

Shkruar Nga
More from revista mapo

Dritëro Agolli: Përherë në rigjenerim të vlerave

Dija për veprën e Dritëroit si gjithë moshatarët e mi, ashtu siç...
Read More