“Ekzekutimet me 10 plumba”: Si u kthyen vrasjet mes bandave të të fortëve të Tiranës

 
 

Kur policia zbuloi edhe një gëzhojë të dhjetë, pak orë pas vrasjes së Devi Kasmit, disa hije të vjetra nisën të shfaqen. Mënyra e ekzekutimit ngjante me një tjetër vrasje që tronditi Tiranën në vitin 2010. Franc Konomi, i njohur si ‘i forti’ i Tiranës sapo kishte dalë nga një lokal pranë “Ushtarit të panjohur” kur një motor i afrohet, duke qëlluar në drejtim të tij plot dhjetë herë. Si në rastin e Kasmit, në motor ishin dy persona. Rishfaqja e emrit të Konomit bëri që gazetarët të gërmojnë në arkiva për të gjetur historinë e tij dhe të djemve të rinj të fillimdemokracisë në Tiranë, që e nisën me grushta e përfunduan duke shitur drogë në rrugët e Europës.

Që prej vitit 2005, emrat e tyre nuk ishin lakuar në media, edhe pse në Perëndim ata bënin trafiqe që sillnin të ardhura të majme. Por më 29 janar të vitit 2018, emrat e tyre u rishfaqën në skenë kur u ekzekutua Devi Kasmi, mik i dikurshëm i Franc Konomit, por më pas i dyshuar për vrasjen. Në lojë është një tjetër emër, ai i Domart Konjarit, që mendohet se ka organizuar vrasjen e Kasmit. Por si ia dolën djemtë e fortë të Tiranës që të vazhdojnë luftën e tyre në mes të Tiranës, thuajse pa u shqetësuar nga policia?

Në fillim të viteve ‘90 në Tiranë u shfaqën “të fortët” e parë, që në fakt nuk kishin asnjë lidhje me grupet e krimit të organizuar që filluan të vepronin në vitet në vazhdim. Por organizimi i tyre nuk zgjati shumë dhe filluan të ndaheshin në zona, më pas të vrisnin njëri-tjetrin.

Në zonën e “Trenit të vjetër” dhe të “Restorant Durrësit” drejtonte Naim Zyberi dhe miqtë e tij, Franc Konomi e Fatos Keta. 

Ata kishin në zotërim tërë lagjen e tyre dhe bënin një grupim shumë të madh në kryeqytet. Duke ndjekur unazën vinte lagjja e Gazmend Muçës, në “Rrugën Bardhyl”.

Në këtë zonë Gaz Muça ishte njeriu më i njohur dhe bënte ligjin sipas mënyrës së tij. Duke qenë se ai dhe Naim Zyberi ishin “të fortë” lagjesh, kishin njohje me njëri-tjetrin por edhe konflikte. Konflikti i fundit ndërmjet tyre ka lindur në prill të vitit 1992.

Franc Konomi, miku i ngushtë i Konjarit, do të mbahej më tepër si një nga ata që morën pjesë në atentatit që iu bë më 7 prill 1992 te “Xhamlliku” Gaz Muçës, edhe pse në atë ngjarje u tha se morën pjesë 4 vetë, edhe vetë Naim Zyberi.

Por edhe ndaj tij u morë hak, më 6 gusht 1997, pasi u vra në një spital në Milano të Italisë. Pak ditë para vrasjes, ndaj tij ishte bërë një atentat në të cilin mbeti i plagosur.

Zyberi në atë kohë u cilësua si autori i vrasjes së Gaz Muçës dhe Artur Grorit. Ndërsa në dhjetor 1997, ekzekutohet Fatos Keta, i cili cilësohej si një nga miqtë më të ngushtë dhe të besuar të Naim Zyberit.

Më 31 korrik 1998 vritet edhe vëllai i Gaz Muçës, Taulanti. Por vrasja e Fatjon Naxhakut më 3 gusht 2005 në afërsi të “Shkollës së Kuqe”, duket se është dhe pika e ndezjes fort të gjakrave mes Franc Konomit dhe kundërshtarëve të tij.

Naxhaku, që kishte mundur të arratisej në mënyrë spektakolare nga burgu i Marsejës në Francë, ishte nisur për të ekzekutuar Domart Konjarin, mikun e ngushtë të Franc Konomit, por nga përballja me të mbetet vetë i vrarë.

E i fundit që u ekzekutua nga të dy grupet ishte Franc Konomi. Më 8 korrik 2010, 10 plumba u lëshuan drejt makinës ku ndodhej ai, pranë “Ushtarit të panjohur”, duke e lënë të vdekur në vend.

Por historia nuk u mbyll me kaq. Konjari u lirua nga gjykata dhe nisi organizimin për vrasjen e personit që i kishte bërë atentat, por edhe që ishte përfolur për vrasjen e Konomit. Plani u finalizua më 29 janar të vitit 2018.

Shkruar Nga
More from Redaksia

Edison Çeraj: Ridiskutim mbi metodën

Edhe Servantes-i, diku në fillim të kryeveprës së tij, na thotë se...
Read More