Fevziu: Blushi në krye të Top Channel? Lajm i mirë, nuk do thyhet kollaj nga presionet

 
 

Blendi Fevziu ka folur për emërimin e mundshëm të Ben Blushit në postin e Drejtorit Ekzekutiv të Top Channel. Në një intervistë për ‘Panorama Plus’, Fevziu e ka konsideruar një lajm të mirë për të gjithë median emërimin e ish-deputetit të PS në krye të këtij televizioni, pasi do të ndikojë në rritjen e cilësisë së gazetarisë. Drejtuesi i ‘Opinion’ thekson se Blushi e ka staturën e fortë për të mos u thyer nga presionet në media, ndërkohë që nuk pret të reflektojë ndjesitë e tij politike në krye të ‘TCH’.

“Nuk kemi folur konkretisht, sepse, mesa di, nuk është ende një çështje e mbyllur, por në parim unë mendoj që vajtja e tij në krye të Top Channel, është një lajm i mirë për të gjithë. Për Topin në radhë të parë, për gazetarinë serioze dhe për ne që punojmë në Klan apo televizione të tjera. Unë e njoh Ben Blushin që fëmijë. Ai është ndër njerëzit që merret me thelbin e gjërave, që lexon, ndjek zhvillimet në botë dhe del tej vizionit provincial që dominon shpesh në mediat tona. Unë nuk e di se si do të jetë ai si drejtor, por jam i bindur që Blushi do të investohet në gazetarinë serioze, në gjërat me thelb dhe nuk do të ndjekë trendin fatkeq të 3-4 viteve të fundit që ka reduktuar gazetarinë në nivele karnavaleske.

E dyta, Blushi ka një staturë të fortë dhe nuk do thyhet kollaj nga presionet në media. As nuk besoj që do të reflektojë aty ndjesitë e tij personale ndaj qeverisë.

E treta, shpresoj shumë që ai të krijojë një traditë ndryshe nga ajo e gazetarisë së pazareve dhe gazetarëve pazarxhinj, që po gëlojnë në media dhe që po i shohin hapësirat e tyre mediatike si mundësi për gjobvënie dhe shantazh financiar.

Së fundmi, ardhja e tij në Top Channel shpresoj se do ndikojë në rritjen e konkurrencës me Klan-in dhe si e tillë do të reflektohet edhe te ne. Kjo është padyshim pozitive. Ka vetëm një formulë magjike për ta çuar përpara një media dhe kjo është konkurrenca.”

Moderatori i ‘Opinion’, Blendi Fevziu shprehet se lëvizjet që ndodhën në media në fund të 2017-s dhe në fillim të 2018-s u imponuan nga largimi i papritur i Sokol Ballës prej Top Channel.

“Nuk ka qenë një proces ristrukturimi i emisioneve, as produkt i analizave të audiencës, por lëvizje të imponuara nga largimi i papritur i Sokol Ballës prej Top Channel”, ka thënë gazetari.

Në intervistës për ‘Panorama Plus’, Fevziu ka komentuar edhe largimin e Ballës: “Nuk i di detajet e konfliktit të Ballës me Top Channel dhe as kam pyetur për këtë. Me emisionin në Vizion është një konkurrent më shumë. Po secili ka shikuesit e tij.”

Sa i përket konkurrencës nga Ylli Rakipi me emisionin ‘Të Paekspozuarit’ në Top Channel, Fevziu ka thënë: “Unë kam konkurrencë nga e hëna të mërkurën 22:00 me 23:15 dhe të enjten 21:00 me 23:00. Çdo lloj emisioni, çdo emër moderatori, e madje edhe çdo filim apo telenovelë janë konkurrentë. Të enjteve ajo që më shqetëson është një telenovelë turke e Klan Plus.”

Në fund, ai ka deklaruar: “Ylli Rakipi, Sokol Balla, Eni Vasili, Zheji tek Ora News apo Roland Qafoku, janë të gjithë konkurrentë. Secili ka pjesën e tij të shikueshmërisë dhe merr një pjesë të shikuesve të tu. E thashë, asnjë mbrëmje tjetër televizive nuk krahasohet me të enjten në 21:00. Dhe kjo është për t’u krenuar.”

 
 
Shkruar Nga
More from Redaksia

Sara Netanyahu, Ndaj bashkëshortes së kryeministrit izraelit janë ngritur akuza…

  Ndaj bashkëshortes së kryeministrit izraelit, Benjamin Netanyahu, Sara, janë ngritur akuza...
Read More