Ish-presidentja dënohet me 24 vite burg për korrupsion

Ish-presidentja e Koresë së Jugut, Park Geun-hye është dënuar me 24 vite burgim, pasi u shpall fajtore për “abuzim me pushtetin” dhe “detyrim me forcë”.

Vendimi i shpallur gjatë një transmetimi të drejtpërdrejtë përfaqëson edhe kulmin e skandalit që preku vendin, e që shkaktoi një irritim të tejskajshëm kundër elitave politike e të biznesit, raporton TCH.

Park, e cila u gjobit edhe me rreth 17 mln dollarë u përball me një gamë të gjerë akuzash për korrupsion. Ajo nuk ishte e pranishme në gjykatë gjatë dhënies së vendimit të kësaj të premteje, teksa kishte bojkotuar edhe seancat dëgjimore, duke akuzuar gjykatat se ishin të njëanshme në çështjen e ngritur kundër saj.

Lëvizja e fundit e autoriteteve gjyqësore në Kore, për lejimin e dhënies së vendimit përmes transmetimit të drejtpërdrejtë, ishte e paprecedentë, por në këtë rast ato u justifikuan me interesin e jashtëzakonshëm publik mbi këtë çështje.

Ajo që shkaktoi të gjithë këtë stuhi ishte një lidhje miqësie. Park u gjet fajtore për bashkëpunim me një mikeshën e saj të afërt, Choi Soon-sil, duke iu ushtruar presion firmave të mëdha të biznesit për ryshfete në këmbim të favoreve politike.

Choi, pushteti i së cilës u rrit së tepërmi si shoqja më me ndikim e ish-presidentes Park, u dënua për korrupsion gjatë muajit shkurt. Marrëdhënia e tyre u bë subjekt i një shqyrtimi të imtësishëm publik mes akuzave se Choi kishte pasur ndikim të panevojshëm mbi çështje kombëtare, vetëm falë lidhjeve me Park.

Prokurorët pretenduan se Park i kishte dhënë qasje në nivele të papranueshme mikeshës Choi në dokumentet zyrtare dhe dolën në përfundimin se kjo e fundit kishte ndërhyrë në çështje shtetërore.

Pas një serie të gjatë dëgjesash dhe protestash disamujore që bënin thirrje për dorëheqjen e Park, ish-presidentja u largua nga detyra në mars të vitit 2017. Menjëherë më pas, ajo u arrestua dhe është mbajtur në paraburgim prej asaj kohe. Ajo u përball me 18 akuza gjithsej, për shumicën e të cilave u shpall fajtore.

Shkruar Nga
More from Redaksia

Frati i sarajeve të myslimanëve

  -Historia e At Erazmit nga Balneo, bazuar në kujtesën e rrallë...
Read More