Konfirmohet vizita e Kim Jong-un në Kinë, hapet rruga për takimin me Trump



Pas ditësh spekulime, është konfirmuar se udhëheqësi i Koresë së Veriut, Kim Jong-un ka vizituar Kinën. Vizita, e konfirmuar nga Kina dhe nga Koreja e Veriut, është e para e ditur e Kim Jong-unit jashtë vendit, që kur ai ka marrë detyrën në vitin 2011.

Kim Jong-un zhvilloi bisedime të suksesshme me liderin kinez, Xi Jinping në Pekin, raportoi agjencia kineze e lajmeve Xinhua.

Kina është aleatja kryesore ekonomike e Koresë së Veriut dhe mendohej gjerësisht se Kim Jong-un do të konsultohej me Pekinin para takimeve të planifikuara me Korenë e Jugut dhe Shtetet e Bashkuara të Amerikës.

Kim Jong-un pritet të takohet me Presidentin koreano-jugor, Moon Jae-in në prill dhe Presidentin amerikan Donald Trump në maj.

Vizita në Pekin ndërkohë konsiderohet si një hap domethënës në përgatitjet e Koresë së Veriut për bisedimet e propozuara. Gjatë vizitës, Kim Jong-un ka siguruar homologun e tij kinez se është i angazhuar të heqë dorë nga armët bërthamore, raportoi po ashtu Xinhua, por me kushte.

“Çështja e denuklearizimit të gadishullit korean mund të zgjidhet nëse Koreja e Jugut dhe SHBA reagojnë ndaj përpjekjeve tona me vullnet të mirë, krijojnë një atmosferë paqeje dhe stabiliteti, ndërsa marrin masa progresive dhe të sinkronizuara për realizimin e paqes”, citohet të ketë thënë Kim Jong-un.

Ky i fundit mbërriti në Pekin i shoqëruar nga bashkëshortja e tij të dielën dhe u largua që andej të martën pasdite.

Udhëtimi është i fundit në një varg aktivitetesh diplomatike të javëve të fundit, pasi lidhjet mes Veriut dhe Jugut nisën të përmirësoheshin në fillim të vitit dhe gjatë Lojrave Olimpike Dimërore në Korenë e Jugut.

Ndërkohë, Uashingtoni ka konfirmuar se Kina e ka informuar administratën Trump për vizitën, të martën.

loading...
Shkruar Nga
More from Redaksia

Përveç Duas dhe Bebes edhe reperi Gashi në “Lollapalooza”

  Festivali Lollapalooza është një nga festivalet më të mëdhenj të muzikës...
Read More