Majko: Të mos bëhemi si Sicilia



hafizi e majkoIsh-kryeministri bën apel për miratimin e Reformës në Drejtësi dhe zbulon axhendën e Sesionit të Pranverës së Asamblesë Parlamentare të vendeve anëtare të NATO-s, që do mbahet në Tiranë

Kur bëhet fjalë për reforma të rëndësishme si ajo e drejtësisë, nga e cila varet fati i integrimit europian të vendit, Pandeli Majko, nuk rezervohet në vlerësime politike të përgjithshme. Nëse nuk miratohet, Shqipëria rrezikon shumë.

“Shqipëria nuk mund të hyjë në Bashkimin Europian pa kryer këtë reformë drejtësie, pasi shoqëria shqiptare rrezikon të kthehet në një shoqëri gjysmë siciliane”, tha dje ish-kryeministri për “Vizion Plus”

E vetmja rrugë, e cila duhet të ndiqet nga politikanët shqiptarë është dialogu, thotë deputeti me një eksperiencë të gjatë politike.

“Ne duhet të jemi të sinqertë me veten, që të tjerët që na shikojnë nga jashtë të jenë po ashtu të sinqertë me ne. E vërteta e vërtetë është që për fat të keq, publiku shqiptar beson më shumë ambasadorët apo ndërkombëtarët sesa politikanët shqiptarë, të cilëve mungesa e skrupujve u rezulton me një histori, e cila na ka sjellë në prag të një dështimi të madh, të mosmiratimit të Reformës në Drejtësi, e cila nuk do të ishte, e kam thënë dhe do ta ripërsëris, nuk do të ishte një dështim i PS-së apo PD-së, por do të ishte dështim i rrugës së Shqipërisë për në BE.”

Pandeli Majko shprehet se politikanët duhet të largohen nga stereotipat e të qenurit njerëz, që për hir të luftës politike, shndërrohen në njerëz të pamatur.

“Mendoj se i duhet dhënë fund të qeverisjes së vendit apo të bërit politikë të vendit duke funksionuar mbi bazën e sistemit të dobësive. Mendoj se ajo që na kërkon Bashkimi Europian dhe specifikisht me Reformën në Drejtësi, po na fton që t’i drejtohemi sistemit të vlerave dhe të lëmë mënjanë sistemin e dobësive dhe funksionimin e bazës së këtij sistemi.”

Si kryetar i delegacionit të parlamentit shqiptar, zoti Majko, vlerëson si moment të rëndësishëm për vendin, zhvillimin e Sesionit të Pranverës së Asamblesë Parlamentare të vendeve anëtare të NATO-s.

“Pa diskutim, terrorizmi do të jetë temë e veçantë, ISIS-i, do të diskutohet mbi temën e marrëdhënieve me Rusinë, çështja e Ukrainës, do diskutohen problemet e integrimit, disa probleme të trajtesave të cilat do të kenë të bëjnë me probleme të brendshme të Aleancës dhe me sfidat e reja që nuk janë thjesht të Aleancës së NATO-s, por sidomos të një marrëdhënieje të re ndërkombëtare, që po vjen në një formë mjaft sfiduese.”

Sesioni do të mbledhë së bashku në Tiranë rreth 700 përfaqësues nga 28 vende anëtare të NATO-s, nga Amerika e Veriut dhe Evropa, si edhe delegatë nga vendet partnere dhe vëzhgues. Pallati i Kongreseve, vendi ku nga datat 27 deri 30 maj do të mbahet sesioni, i është shndërruar një rikonstruksioni të plotë. Nga dita e martë, ai është marrë në mbikëqyrje të forcave të Gardës së Republikës dhe policisë.

loading...
Shkruar Nga
More from revista mapo

Progresi ka prekur fundin dhe teknologjia nuk është zgjidhja

Mësimet do të merren on-line, mësuesi do t’u nisë materialet on-line, ushtrimet...
Read More