Marrëveshja me Ramën, cilët janë ministrat e propozuar nga Basha



basha dhe ramaLista e propozuar nga kreu i PD-së, Lulzim Basha, në fakt nuk solli ndonjë risi nëse shikohen me hollësi CV-të e secilit prej tyre. Disa prej kandidatëve nuk janë as më shumë e as më pak se ish-përfaqësues të administratës “Berisha” në pozicione kyçe

Takimi mes Edi Ramës dhe Lulzim Bashës dje në Pallatin e Kongreseve ka qenë aq sa për të prezantuar formalisht emrat që kryetari i demokratëve dorëzoi në tavolinë për postin e zv.kryeministrit, gjashtë ministrave, kreut të KQZ-së dhe Avokatit të Popullit.

Lista e propozuar nga kreu i PD-së, Lulzim Basha, në fakt nuk solli ndonjë risi nëse shikohen me hollësi CV-të e secilit prej tyre. Disa prej kandidatëve nuk janë as më shumë e as më pak se ish-përfaqësues të administratës “Berisha” në pozicione kyçe. Në postin e zv.kryeministrit është zgjedhur Ledina Mandia, ish-Avokate e Shtetit, e cila muaj më parë dëshmoi në komisionin hetimor parlamentar për çështjen “CEZ”.

Në detyrën e ministrit të Brendshëm është propozuar Dritan Demiraj. Ai është liruar nga detyra në dhjetor të vitit 2014 nga ministrja aktuale e Mbrojtjes, Mimi Kodheli. Demiraj ka 31 vite kontribut në Forcat e Armatosura, rreshton 47 medalje në ushtri, autor i disa librave, si dhe ka marrë pjesë në misionet paqeruajtëse në Afganistan.

Ish-komandat i Forcave Speciale ushtarake, Demiraj do të ulet tanimë në një tryezë pune me ministren Kodheli, sa herë që Rama do të mbledhë qeverinë. Shkarkimi i Demirajt asokohe u shoqërua me komente të shumta, ku nuk mungoi një postim i gjatë edhe i ish-kryeministrit Sali Berisha.

Ministrja e re e Financave do të jetë Helga Vukaj. Ajo e ka filluar karrierën e saj në vitin 2003 si juriste e Presidentit të Republikës, për të vijuar më pas në vitin 2005-2006 si Drejtore e Drejtorisë së Shërbimeve Juridike në Ministrinë e Brendshme. Për periudhën 2006–2012, Helga Vukaj ka mbajtur një pozicion të rëndësishëm, atë të zv.drejtorit të Përgjithshëm të Agjencisë së Kthimit dhe Kompensimit të Pronave.

Gazmend Bardhi emërohet në detyrën e ministrit të Drejtësisë. Bardhi gëzon reputacion në radhët e PD-së dhe deri më sot ka ruajtur profilin e tij teknik duke punuar si këshilltar ligjor i grupit parlamentar. Ai ka qenë ekspert pranë Komisionit të Posaçëm Parlamentar për Reformën në Drejtësi, ndërsa më herët ka punuar në Drejtorinë e Përgjithshme të Kodifikimit.

Ministër i Arsimit dhe Sportit është propozuar Mirela Karabina. Ajo ka punuar si pedagoge në Fakultetin e Shkencave Sociale dhe në fakultetin Albanian University.

Në CV-në e saj, ajo radhit një eksperiencë të gjatë në mësimdhënie. Mirela Karabina është edhe bashkëshortja e ambasadorit në karrierë dhe ish-zv.ministrit të Mbrojtjes, Petrit Karabina.

Ministre e Mirëqenies Sociale dhe Rinisë do të jetë Xhuljeta Kërtusha. Në periudhën 2010–2015, Kertusha ka qenë drejtoreshë e Njësisë së Blerjes së Energjisë dhe Zhvillimit Rajonal të Tregut në kompaninë CEZ.

Ministër i Shëndetësisë është propozuar kirurgu Arben Beqiri. Ai është profesor i Kirurgjisë në Universitetin e Mjekësisë. Në CV-në e tij, Beqiri përfshin detyrën e zëvendës/rektorit, Universiteti i Mjekësisë, kirurg në Qendrën Spitalore Universitare “Nene Tereza”. Beqiri gëzon reputacion në radhët e mjekëve.

Në postin e kryetarit të KQZ-së, do të shkoje Klement Zguri, aktualisht anëtar i KQZ-së. Ndërsa në detyrën e Avokatit të Popullit do të shkojë avokatja e njohur Erinda Ballanca. Ajo ka qenë avokate e ish­kryeministrit Sali Berisha në gjyqin e hapur ndaj tij për shpifje vite më parë nga Aneta Rama, e ëma e kryeministrit Edi Rama. Ballanca ka përfaqësuar gjithashtu në gjykatë për rrugën e Kombit edhe kreun aktual të PD­së, Lulzim Basha, në periudhën kur ai ishte ministër i Transporteve.

  1. Zëvendëskryeministër: Znj. Ledina Mandia
  2. Ministër i Brendshëm: Z. Dritan Demiraj
  3. Ministër i Financave: Znj. Helga Vukaj
  4. Ministër i Drejtësisë: Z. Gazment Bardhi
  5. Ministër i Arsimit dhe Sportit: Znj. Mirela Karabina
  6. Ministër i Shëndetësisë: Z. Arben Beqiri
  7. Ministër i Mirëqenies Sociale dhe Rinisë: Znj. Xhulieta Kërtusha

Ministri i Shëndetësisë, Arben Beqiri

Profesor i Kirurgjisë në Universitetin e Mjekësisë, Tiranë

2013 Zëvendës/rektor, Universiteti Mjekësisë, Tiranë

1993-deri tani kirurg në Qendrën Spitalore Universitare “Nënë Tereza”

1993-deri tani Pedagog në Universitetin e Mjekësisë, Tiranë.

Ministrja e Financave, Helga Vukaj

2003 juriste në Presidencë

2005–2006 drejtore e Drejtorisë së Shërbimeve Juridike, MB

2006 – 2012 Zv.drejtor i Përgjithshëm i Agjencisë së Kthimit dhe kompensimit të Pronave

2012–2016 Drejtoreshë në KLSH

Ministër i Arsimit dhe Sportit, Mirela Karabina

Pedagoge e jashtme UT, Fakulteti i Shkencave Sociale 2010

Pedagoge e jashtme AU, Fakulteti i Edukimit 2016

Nëndrejtore, Shkolla 12-vjeçare “Faik Konica” 2014-2016

Pedagoge e jashtme AU, Fakulteti i Edukimit 2014-2015

Ambasada e Shqipërisë, Bullgari (bashkëshorte e Ambasadorit) 2011-2014

Drejtore në shkollën 9-vjeçare “P. Budi”, Tiranë 2005-2011

Ministër i Drejtësisë, Gazmend Bardhi

Nëntor 2013 – Aktualisht këshilltar ligjor i grupit të PD

2015–2016 Ekspert pranë Komisionit të Posaçëm Parlamentar për Reformën në Drejtësi

2008–2013 drejtor i oponencës Drejtoria e Përgjithshme e Kodifikimit

Maj 2012–Shtator 2012 këshilltar i ministrit

Ministër i Brendshëm, Dritan Demiraj

Demiraj ka 31 vite kontribut në Forcat e Armatosura, rreshton 47 medalje në ushtri, autor i disa librave, si dhe ka marrë pjesë në misionet paqeruajtëse në Afganistan. Ish-komandat i Forcave Speciale ushtarake. Ai ka marrë gjithashtu medaljen “Nderi i Kombit” në Shtator 2014 nga Presidenti i Republikës, Bujar Nishani.

Ministër i Mirëqenies Sociale dhe Rinisë, Xhuljeta Kërtusha

2010–2015 Drejtoreshë e Njësisë së Blerjes së Energjisë dhe Zhvillimit Rajonal të Tregut

2009–2010 Drejtoreshë e Divizionit të Furnizuesit Publik me Shumicë

2009–2010 Anëtare e Këshillit Mbikëqyrës së Termocentralit të Vlorës

Janar–Tetor 2009 Drejtoreshë e Shfrytëzimit dhe Monitorimit të Kaskadës së Drinit

loading...
Shkruar Nga
More from revista mapo

Intelektualët nuk janë zhdukur, por gjithçka është shndërruar në opinion

Në një kohë që kudo trumbetohej për cikle reformash apo reformizëm të...
Read More