Momenti e do që Vetëvendosja të qëndrojë larg qeverisë

Nga Ervis Iljazaj

Për shkak të një sistemi zgjedhor i cili nuk arrin dot të nxjerrë një mazhorancë fituese dhe si pasojë një qeveri të qëndrueshme, Kosova po kalon një moment të paqëndrueshëm institucional, pasi nuk po arrihet të krijohen numrat e duhur për krijimin e një mazhorance qeverisëse.

Kjo për faj edhe të një sistemi zgjedhor, i cili ka patur parasysh vetëm përfaqësimin politik dhe jo qëndrueshmërinë politike. Si çdo shtet që është një regjim i ri politik demokratik, fokusi kryesor i sistemit zgjedhor është vetëm përfaqësimi i çdo shtrese shoqërore dhe bindjeje politike. Mirëpo, demokracia përveçse përfaqësim është dhe vendimmarrje.

Kështu që, Kosova është duke vuajtur një paqëndrueshmëri politike e cila po e detyron të hasë vështirësi në krijimin e një mazhorance politike.

Ka një situatë paksa absurde në këtë moment në Kosovë, sepse koalicioni i parë nuk arriti dot të merrte mazhorancën absolute të mandateve parlamentare. Kjo situatë ka rritur pretendimet e Lëvizjes Vetëvendosje sipas Kushtetutës së Kosovës të ketë mundësinë e krijimit të qeverisë nëse koalicioni i parë nuk ia arrin dot.

Përtej debatit nëse e ka këtë të drejtë morale dhe kushtetuese Lëvizja Vetëvendosje të krijojë qeverinë, konteksti i momentit politik të Kosovës si dhe prosperiteti i saj në arenën ndërkombëtare e do që të qëndrojë larg qeverisjes së vendit.

Pavarësia e Kosovës u shpall dhe u pranua nga shumë shtete brenda një konteksti të caktuar dhe me disa kushte të caktuara. Pra, brenda një gjeopolitike rajonale Kosova e mori pavarësinë me disa lëshime që duhet të bënte.

Këto kushte si dhe politika që kanë ndjekur qeveritë e Kosovës përgjatë këtyre viteve, kanë qenë objekti i protestave dhe kritikave që e kthyen Vetëvendosjen në një lëvizje politike të rëndësishme. Duke kritikuar një politikë të moderuar dhe të kujdesshme në raportet ndërkombëtare, Vetëvendosja lindi dhe u rrit si një lëvizje radikale. Jo më kot të gjitha negociatat e zhvilluara nga Kosova kanë hasur në protestat e forta të Vetëvendosjes. Duke luajtur me një nacionalizëm radikal dhe një populizëm që nuk merrte parasysh asnjë kontekst politik e kishte të lehtë të kthehej në një forcë politike që gëzonte mbështetjen e një pjese të konsiderueshme të shoqërisë kosovare.

Zgjedhjet e fundit e treguan këtë dhe, që nga ky moment liderët e saj politikë dhe e gjithë lëvizja kanë marrë pamjen e një forcë politike të moderuar me shpresën se do të kenë mundësi të qeverisin vendin. Një metamorfozë e cila vjen e detyrueshme, pasi tjetër gjë është të jesh një forcë politike në opozitë dhe kritike dhe tjetër të kesh përgjegjësinë të qeverisësh vendin, aq më tepër Kosovën si një shtet i ri.

Momenti politik i Kosovës ka arritur në një pikë kyçe të tij. Në tavolinë janë bisedime të rëndësishme për fatin e saj rajonal dhe europian. Gjërat duken se po shkojnë për mirë, duke marrë parasysh dhe deklaratat e fundit të Vuçiç, i cili pranoi realitetin e ri në rajon që është Kosova si një shtet i pavarur.

Të gjitha këto emancipime kanë ardhur si pasojë e negociatave të moderuara. Në këtë kuptim vazhdimësia e këtij kursi politik ndërkombëtar ka ende nevojë për politikanë të moderuar dhe të kujdesshëm dhe jo politika radikale që propagandon Lëvizja Vetëvendosje. Që mos të shkatërrohet çdo gjë e mirë që është bërë deri më tani në këtë drejtim, Kosova ka ende të domosdoshme parti politike që kanë sensin e përgjegjësisë dhe progresivitetin politik.

Shkruar Nga
More from Enton Palushi

Kryemadhi: Shumë shpejt do të shkojmë në zgjedhje…

Kryetarja e LSI-së, Monika Kryemadhi ka paralajmëruar sot se vendi shumë shpejt...
Read More

Leave a Reply

Your email address will not be published.