Nishani e ka kthyer 20 herë ‘Ramën’, ‘Berishën’ asnjëherë



Bujar Nishani dhe Edi RamaNë dy vite e gjysmë, kreu i shtetit ka rrëzuar 20 ligje të miratuara nga shumica e majtë. Ndërkohë që në 1 vit e gjysmë të qeverisjes së demokratëve nuk shënohet asnjë ligj i kthyer. Shumica kanë pasur të bëjnë me reformat e ekzekutivit. Asnjë nga ligjet e kthyera nuk është marrë në konsideratë nga mazhoranca, çka tregon se përplasja ka qenë më shumë një betejë e karakterit politik se sa ligjor.

Përplasja e hapur në distancë mes Presidentit të Republikës, Bujar Nishani dhe kryeministrit, Edi Rama, dy javë më parë, ku nuk munguan edhe etiketimet e rënda nga të dyja krahët, është vetëm finalja e një raporti të tensionuar mes qeverisë dhe presidencës, të nisur që me ardhjen e të majtëve në pushtet.

Pavarësisht se 4 vite më parë, socialistët, në respekt të solemnitetit të institucionit të kreut të shtetit, do të bëheshin pjesë e ceremonisë së marrjes së detyrës si President i Republikës nga Bujar Nishani, marrëdhëniet mes tyre kanë qenë vështirë të mbeten edhe institucionale, ku nuk kanë munguar jo vetëm përplasjet verbale, por edhe ato ligjore.

Ndërsa mazhoranca e majtë do të ndërmerrte disa nisma ligjore që do të kufizonin kompetencat e Presidentit, ky i fundit do të kundërpërgjigjej në vazhdimësi me mjetet që kishte në dorë, duke refuzuar një sërë ligjesh të rëndësishme që mazhoranca i ka konsideruar si reforma.

Për rrjedhojë, në vetëm 2 vite e gjysmë, Presidenti i Republikës rezulton se iu ka kthyer mazhorancës, jo pak por plot 20 ligje.

Bëhet fjalë për nismat më të rëndësishme që ka ndërmarrë qeveria e majtë në kuadër të reformave shtetbërëse, siç i quan ajo.

Por, është fakt se asnjë nga ligjet e kthyera të Presidentit nuk është marrë në konsideratë nga mazhoranca, çka tregon se përplasja e tyre ka qenë më shumë një betejë e karakterit politik sesa ligjor.

Dekretet

Beteja e parë mes tyre do të ishte pikërisht për ligjin e “Nëpunësit Civil”, i cili ishte dhe ligji i parë i qeverisë së majtë. Kreu i shtetit refuzoi të dekretojë aktin normativ, me të cilin qeveria ndryshoi ligjin, duke u bërë kështu pjesë e një beteje politike që qeveria kishte edhe me opozitën.

Pavarësisht kësaj përpjekjeje, mazhoranca do t’i rivotonte këto ndryshime në parlament, duke prekur kështu një ligj që vetëm pak muaj më parë ishte miratuar me konsensusin e të dyja palëve.

Beteja e dytë mes Presidentit dhe qeverisë ishte ajo për paketën e ligjeve të forcave të armatosura. Presidenti refuzoi të dekretojë të tria ligjet e kësaj pakete, me argumentin se ato cenonin kompetencat e tij si Komandant i Përgjithshëm i Forcave të Armatosura.

Edhe në këtë rast, beteja do të përfundonte me rivotimin në parlament dhe ankimimin më pas në Gjykatë Kushtetuese.

Beteja e tretë ka qenë ajo për institucionet e drejtësisë, ku mazhoranca e ardhur në pushtet do të synonte që me anë të disa ligjeve, të zhbënte disa vendime të qeverisjes së mëparshme, për të zëvendësuar disa emra.

Bëhet fjalë për ndryshimet në ligjin “Për Këshillin e Lartë të Drejtësisë” dhe ligjin “Për Shkollën e Magjistraturës”, me anë të të cilëve, të majtët bënë edhe zëvendësimin e përfaqësuesve që zgjidhen nga Kuvendi.

Presidenti refuzoi sërish të dekretonte këto dy ligje, pasi cenonin kompetencat e tij.

Një tjetër ligj i refuzuar dhe që i përket fushës së drejtësisë është ai “Për Gjykatën e Lartë”, me anë të të cilit qeveria u përpoq që të zhbllokojë ngërçin e zgjedhjes së anëtarëve të Gjykatës së Lartë, duke i hequr kreut të shtetit disa të drejta sa i përket përzgjedhjes së kandidatëve.

Por pavarësisht kësaj ndërhyrjeje, situata nuk u zhbllokua.

Një tjetër ligj që kreu i shtetit i ka kthyer qeverisë për rivotim në parlament ka qenë edhe ai “Për Policinë e Shtetit”, ku përfshihej edhe një pjesë e Byrosë Kombëtare të Hetimit.

Presidenti argumentoi se “kemi të bëjmë me një strukturë, e cila krijon paralelizma në kompetenca dhe kontradiksion me objektin e veprimtarisë së organit të Prokurorisë dhe Policisë Gjyqësore, për të cilat ka tashmë një kuadër ligjor që e mirëpërcakton”.

Pas refuzimit të mazhorancës për ta korrigjuar këtë ligj, çështja shkoi në Gjykatë Kushtetuese, ku pjesa e Byrosë Kombëtare u rrëzua.

Reforma

Pjesë e listës së ligjeve të kthyera nga Presidenti është dhe ai që në fakt përbën një nga reformat më të thella ligjore të realizuara nga të majtët dhe ka të bëjë me ndarjen territoriale.

Presidenti nuk pranoi ta dekretojë këtë ndarje, ndërsa mazhoranca e rivotoi edhe një herë.

Çështja shkoi në Gjykatën Kushtetuese, e cila la në fuqi ligjin.

Gjithashtu, një tjetër ligj që kreu i shtetit ka kthyer në këto dy vite e gjysmë të qeverisjes së të majtëve, ishte edhe ndryshimi në ligjin “Për huamarrjen”, ku qeveria i jepte të drejtë vetes të merrte më shumë borxh nga jashtë. Beteja e Presidentit me ligjshmërinë e nismave të qeverisë vazhdoi me ligjin “Për Arsimin e Lartë”, “Për Shërbimin me Jashtë”, “Për marrëveshjet ndërkombëtare”, “Për mediat audiovizive”, e një sërë ligjesh të tjera.

Ndaj, jo vetëm për shkak të deklaratave dhe të shkuarës së tij politike, por edhe si pasojë e të gjithë këtyre ligjeve të kthyera, mazhoranca ka vënë në dyshim paanshmërinë e qëndrimeve të Presidentit.

Pa u futur në argumentet ligjore që palët kanë përdorur për kushtetutshmërinë e këtyre nismave, është fakt se ndërsa socialistëve presidenti iu ka kthyer 20 ligje në dy vite e gjysmë, demokratëve në 1 vit e gjysmë nuk u ktheu asnjë ligj.

*Ky shkrim botohet në kuadër të projektit “Udha e Shkronjave” i mbështetur nga qendra UET

Ligjet e kthyera

  1. Ligji nr. 161/2013 “Për miratimin e aktit normativ, me fuqinë e ligjit, nr. 5, datë 30.9.2013, të Këshillit të Ministrave, “Për disa ndryshime në ligjin nr. 152/2013 “Për nëpunësin civil””. Nr. Dekretit 8383. Tiranë, më 08.11.2013.
  1. Ligji nr. 45/2014 “Për disa ndryshime dhe shtesa në ligjin nr. 9049, datë 10.4.2003, “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, të ndryshuar””. Nr. Dekretit 8566. Tiranë, më 16.5.2014.
  1. Ligji “Për Forcat e Armatosura”.
  1. Ligji nr. 64/2014 “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”.
  1. Ligji nr. 59/2014 “Për karrierën ushtarake në Forcat e Armatosura”.
  1. Ligji “Për organizimin dhe funksionimin e Gjykatave Administrative dhe gjykimin e mosmarrëveshjeve administrative”.
  1. Ligji “Për organizimin dhe funksionimin e Këshillit të Lartë të Drejtësisë”.
  1. Ligji “Për Policinë e Shtetit”.
  1. Ligji nr. 97/2014 “Për Shkollën e Magjistraturës”.
  1. Ligji nr. 115/2014 “Për ndarjen administrativo – territoriale të njësive të qeverisjes vendore në Republikën e Shqipërisë”. Nr. Dekretit 8696. Tiranë, më 22.8.2014.
  1. Ligji nr. 154/2014 “Për Organizimin dhe Funksionimin e Kontrollit të Lartë të Shtetit”. Nr. Dekretit 8851. Tiranë, më 19.12.2014.
  1. Ligji nr. 181/2014 “Për disa ndryshime dhe shtesa në ligjin nr. 9665, datë 18.12.2006, “Për huamarrjen shtetërore, borxhin shtetëror dhe garancitë shtetërore të huas në Republikën e Shqipërisë”. Nr. Dekretit 8899. Tiranë, më 16.1.2015.
  1. Ligji nr. 177/2014 “Për disa shtesa dhe ndryshime në ligjin nr. 8588, datë 15.3.2000, “Për organizimin dhe funksionimin e Gjykatës së Lartë të Republikës së Shqipërisë”, të ndryshuar.” Nr. Dekretit 8894. Tiranë, më 9.1.2015.
  1. Ligji nr. 23/2015 “Për Shërbimin e Jashtëm të Republikës së Shqipërisë”. Nr. Dekretit 9043. Tiranë, më 10.4.2015.

15.Ligji nr. 80/2015 “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”. Nr. Dekretit 9206. Tiranë, më 14.8.2015.

  1. Ligji nr. 93/2015 “Për turizmin”. Nr. Dekretit 9205. Tiranë, më 7.8.2015.
  1. Ligji nr. 133/2015 “Për trajtimin e pronës dhe përfundimin e procesit të kompensimit të pronave”. Nr. Dekretit 9377. Tiranë, më 29.12.2015.
  1. Ligji nr. 22/2016 “Për disa shtesa dhe ndryshime në Ligjin nr. 97/2013, “Për mediat audiovizive në Republikën e Shqipërisë”. Nr. Dekretit 9499. Tiranë, më 1.4.2016.
  1. Ligji nr. 19/2016 “Për masat shtesë të sigurisë publike”. Nr. Dekretit 9501. Tiranë, më 4.4.2016.
  1. Ligji nr. 43/2016 “Për marrëveshjet ndërkombëtare të Republikës së Shqipërisë”. Nr. Dekretit 9577. Tiranë, më 5.5.2016.
loading...
Shkruar Nga
More from revista mapo

Kushner: Nuk më shqetësojnë idetë e bashkimit të shqiptarëve

Bernard Kushner, administratori i parë i Kosovës në 1999, në dy vitet...
Read More