Që nga 41-shi i kemi shpallur luftë kapitalizmit, është koha ta vendosim plotësisht



Nga Ervis Iljazaj

Dje në Forumet UET ishte i ftuar në një bashkëbisedim me studentët dhe pedagogët Samir Mane, njeriu më i pasur i Shqipërisë, i cili shpeshherë merret shembull se si një person mund të jetë i suksesshëm në sipërmarrje dhe në iniciativën e lirë ekonomike. Por, në të njëjtën kohë, Samir Mane mund të jetë edhe nga personat më të urryer nga një pjesë e shoqërisë dhe e opinionit publik, pasi simbolizon për këtë mendësi të mykur, atë që sot e quajnë oligarkinë shqiptare.

Një absurditet, i cili vjen nga padituria se çfarë është oligarkia, në rastin më të mirë, dhe në rastin më të keq, nga lufta e shpallur publikisht që një pjesë e opinionit publik dhe personave që merren me të, bëjnë kundër kapitalizmit. Sepse, Samir Mane, në një farë mënyre simbolizon kapitalizmin shqiptar, i cili po has rezistencë pikërisht nga kjo mendësi, që të instalohet plotësisht.

Në fakt, lufta kundër kapitalizmit në Shqipëri vazhdon e njëjta që nga viti 1941 e deri më tani. Pikërisht ky është problemi i shoqërisë dhe ekonomisë sonë. Është koha që të kthejmë sytë nga e kundërta nëse vërtet dëshirojmë të arrijmë zhvillimin ekonomik dhe shoqëror. Është koha të shpallim “luftën” kundër shtetit.

Ende në Shqipëri, mendojnë se hallet tona do na i zgjidhë shteti dhe për këtë arsye jemi në pritje të një politikani profet që do të merret me to. Një profet i cili nuk do të mbërrijë kurrë, pasi, me përkufizim, sa më shumë kompetenca t’i japim politikës duke menduar në këtë mënyrë, aq më shumë rritet pushteti i tyre, sa më shumë pushtet të kenë ata, aq më shumë është tendenca për korrupsion dhe abuzim në dëm të ekonomisë dhe shoqërisë. Kështu që, e vetmja rrugë për zhvillim e Shqipërisë është vendosja e plotë e kapitalizmit. Të gjitha të tjerat janë rrugë hipokrite dhe nuk të çojnë asgjëkund. Në fakt e kemi provuar këto 27 vite çdo gjë tjetër përveçse kapitalizmit dhe kemi dështuar në mënyrë të suksesshme.

Rrënjët e kulturës antikapitaliste janë të thella në shoqërinë shqiptare dhe në një pjesë të elitës së saj. Për këtë arsye kapitalizmi has vështirësi për t’u instaluar njëherë e mirë.

Po të vështrosh me kujdes, edhe në ditë e fundit, me protestën e qytetarëve të Kukësit, përtej rastit konkret, shumë shpejt u ngrit një frymë pothuajse bolshevike kundër kapitalit dhe biznesit privat, me thirrje publike kundër tij, a thua se ende nuk i kemi mbyllur punët njëherë e mirë me luftën e klasave.

Megjithatë, në një shoqëri si kjo e jona, e cila ka tashmë shumë dekada që jeton me premtimin e lumturisë së përjetshme që ofron ekonomia shtetërore, e cila falimentoi kudo që është provuar, kapitalizmi ka për të patur vështirësi për t’u kthyer në sistem. Për një arsye shumë të thjeshtë, ekonomia shqiptare nuk e ka njohur asnjëherë ekonominë e tregut të vërtetë.

Në librin e tij “Mentaliteti Antikapitalist”, Von Mises, një nga mendimtarët më të rëndësishëm të liberalizmit, jep një mesazh shumë të qartë se përse ekziston një mentalitet i tillë në shumë shoqëri. Sepse, kapitalizmi dhe ekonomia e tregut, i heq çdo justifikim njeriut për dështimet e tij. Në këtë mënyrë, ekonomia e tregut kthehet e papërballueshme në aspektin psikologjik të çdo personi. Prandaj, për të vazhduar për të ëndërruar dhe gjetur justifikimet përkatëse për çdo dështim, njerëzit i kthejnë sytë nga shteti dhe premtimet e tij për lumturinë e përjetshme. Premtime, të cilat janë faktuar që janë thjesht iluzione. Megjithatë njerëzit kanë nevojë për iluzione, prandaj edhe vazhdojnë iu besojnë atyre.

loading...
Shkruar Nga
More from Enton Palushi

Përse Berisha, Kryemadhi dhe Meta janë të interesuar të rrisin profilin politik të Veliajt?

Nga Ervis Iljazaj Sali Berisha ka bërë publik ditën e djeshme një...
Read More