SHBA peshon alternativat për Afganistanin

Administrata Trump ndodhet pranë një vendimi mbi një strategji të re për luftën 16-vjeçare në Afganistan, konflikti më i gjatë në historinë amerikane.

Sekretari i mbrojtjes Jim Mattis nuk ka lënë të kuptohet se cila do të jetë strategjia e re ndërsa pritet të takohet sot me presidentin Trump.

Dje për gazetarët në Uashington, zoti Mattis tha se parashikon marrjen e një vendimi mbi këtë çështje “në një të ardhme shumë të afërt”.

Presidenti Trump do të takohet me nënpresidentin Mike Pence dhe ekipin e tij të sigurisë kombëtare në Camp David në Merilend.

Opsionet përfshijnë dërgimin e mijëra trupave shtesë në vendin e shkatërruar nga lufta ose tërheqjen krejtësisht të tyre, duke lënë kontraktorët ushtarakë privatë të ndihmojnë në menaxhimin e situatës së vështirë të sigurisë atje.

Pas vitesh mbështetjeje të gjerë nga Shtetet e Bashkuara dhe vendet e tjera anëtare të NATO-s, ushtria afgane ende po përpiqet t’i rezistojë talebanëve, të cilët kohët e fundit kanë bërë përparime në Afganistan dhe rajonin kufitar të Pakistanit. Gjeneralët amerikanë e kanë përshkruar konfliktin si një “rrugë pa krye”.

Presidenti Trump autorizoi sekretarin Mattis të përcaktojë numrin e trupave në Afganistan, por numri i tyre vazhdon të mbetet i pandryshuar. Në Afganistan operojnë rreth 8,400 trupa amerikane dhe rreth 5,000 trupa të NATO-s, të cilët shërbejnë kryesisht për këshillim dhe trajnim.

Shkruar Nga
More from Revista User

Obama me postimin më të pëlqyer në Twitter për vitin 2017

Barack Obama, edhe pse është jashtë Shtëpisë së Bardhë për më pak...
Read More