Si u zbulua rrjeti i trafikut të armëve nga polici ‘blerës’



Gjykata e Krimeve të Rënda vendos masën e sigurisë “arrest me burg pa afat” për Adil Mersinllarin dhe Bledar Muçollarin. Si ra policia në gjurmët e trafikantëve duke përdoruar agjentin infiltrues dhe dyshimet, se armët mund të shiteshin jashtë vendit. Rrjeti dyshohet se është më i madh, priten të tjera arrestime.

Dy të dyshuarit për trafikun e armëve dhe municioneve ushtarake, do të qëndrojnë në arrest me burg pa afat.

Ky ishte vendimi i djeshëm i dhënë nga Gjykata e Krimeve të Rënda për Adil Mersinllarin dhe Bledar Muçollarin.

Dy banuesit nga fshati Moglicë i Korçës, u arrestuan nga forcat speciale të policisë, në një operacion të organizuar për shkatërrimin e rrjetit që merrej me trafikun e armëve.

Por ndërsa ata para gjykatës nuk kanë pranuar që të japin shpjegime në lidhje me akuzat, hetimet zbulojnë hollësi të reja.

Në lidhje me këtë grup, strukturat e rendit kishin marrë të dhëna në rrugë operative rreth katër muaj më parë dhe menjëherë nisën gjurmimin.

Fillimisht një agjent i policisë i infiltruar si trafikant, u ka blerë dy të pandehurve një sasi municionesh.

Pasi ka siguruar “besimin” edhe te trafikantët, policia dhe prokuroria vendosi që të stimulohet një blerje më e madhe.

Pikërisht kjo ishte koha kur dy trafikantët u angazhuan që të siguronin sa më shumë armë dhe municione.

Ajo që vihet re është se janë armë të kalibrit të madh si mitraloza, eksploziv i fuqishëm, granatahedhës, predha, murtaja, karikatorë automatiku dhe shumë municione të kalibrave të ndryshëm.

Kjo ka bërë të dyshohet se bëhet fjalë për një trafik ndërkombëtar të armëve, ku synimi ishte kryesisht Maqedonia dhe Greqia.

Për një kohë të gjatë, të arrestuarit kanë qenë nën survejim dhe përveç përgjimit telefonik ka edhe përgjime ambientale, që konsiderohen si prova për implikimin e tyre në këtë trafik. Sipas burimeve nga grupi i hetimit, në këtë rrjet dyshohet se janë përfshirë edhe persona të tjerë.

Në të paktën katër raste, hetimet zbuluan individë të cilët siguronin një pjesë të këtyre armëve.

Për ta pritet që të lëshohet urdhër-arresti në ditët e ardhshme, ndërsa Mersinllari dhe Muçollari u arrestuan në kushtet e flagrancës në fshatin Moglicë.

Edhe në këtë rast, punën kryesore për shkatërrimin e këtij grupi e ka kryer efektivi i policisë i inflitruar.

Ai u kishte premtuar 10 mijë euro dy të pandehurve, për një sasi armësh dhe më pas u kërkoi që një pjesë të tyre ta dërgonin në Tiranë.

Nëse ata do pranonin dërgimin e armëve në Tiranë, forcat e policisë parashikonin ndërhyrjen gjatë rrugës. Gjithsesi, Mersinllari dhe Muçollari nuk kanë pranuar, duke i kërkuar “blerësit” që sasinë e parë që kërkonte duhet të vinte që ta merrte vetë në Korçë.

Dy banorët e fshatit Moglicë kishin bërë gati armët dhe municionet dhe prisnin të merrnin në duar 10 mijë euro nga shitja, por u zunë në befasi nga ana e policisë.

Aksioni ishte i mirorganizuar, ku në një distancë me automjetin që udhëtonte polici i infiltruar, kanë qenë efektivët e Grupit të Operacioneve Speciale.

Sapo mbërritën në vendin ku ishte planifikuar shitja e armëve, dy të pandehurit u arrestuan në flagrancë, duke mos iu lënë asnjë mundësi largimi.

Të gjitha armatimet dhe municionet e siguruara janë të prodhimit kinez, me përjashtim të një sasie të fuqishme eksplozivi të vendosur në gypa të veçantë metali dhe që aktivizoheshin nëpërmjet ndezësve me detonatorë.

Armët e rënda nuk ishin për tregun vendës, por për të arritur deri në linjat e tjera të trafikut kërkohet që hetimet të jenë më të thelluara nga ana e prokurorisë dhe policisë.

Armët e sekuestruara në operacionin “Moglica”

  • 57 copë kallëpe tritoli të masës 400 gr për çdo kallëp.
  • 103 copë granata sulmuese “defensive”.
  • 100 copë ndezës granatash.
  • 1 granatahedhës.
  • 23 predha granatahedhësi.
  • 20 kuti në formë tubi, të dyshuara si eksplozive.
  • 2 kaseta metalike dhe 1 kuti metalike për mbajtje fishekësh.

Në total sasia e fishekëve 1640 copë.

  • 1 shtrat trekëmbësh për mitraloz të rëndë.
  • 216 copë krehra mbajtës fishekësh model 56, kalibër 7.62 mm.
  • 3 murtaja me trekëmbësha dhe pjatat kupore.
  • 2 mitraloza të rëndë, së bashku me trekëmbëshat mbajtës.
  • 20 pjesë mitralozash të rëndë të çmontuar.
  • 1 shirit metalik me 250 copë fishekë mitralozi.
loading...
Shkruar Nga
More from revista mapo

Kryetari i Gjykatës së Gjirokastrës kërkon seks në këmbim të vendimit

Emisioni “Stop” publikoi një regjistrim audio ku kryetari i Gjykatës së Gjirokastrës...
Read More