Vijojnë përplasjet, rëndohet bilanci i viktimave në Rripin e Gazës

Mijëra palestinezë në Gaza marshuan drejt kufirit izraelit, në nisje të një proteste gjashtëjavore, ndërsa përballja dhe përleshjet s’mund të mungonin.

Autoritetet palestineze raportuan se të paktën 16 persona janë vrarë dhe 750 të tjerë u plagosën, kryesisht nga plumbat e ushtrisë izraelite.

Kjo e fundit njoftoi ndërkohë se ka pasur revolta në të paktën 6 zona përgjatë kufirit, e se ka hapur zjarr ndaj nxitësve kryesorë të tyre.

Palestinezët kanë ngritur 5 kampe përgjatë kufirit për protestën, e cila është pagëzuar me emrin “Marshimi i madh i kthimit” .

Ata kërkojnë që refugjatët të lejohen të kthehen në shtëpitë e tyre, që tani janë në Izrael. Por, Izraeli e cilëson protestën një mbulim për sulme terroriste dhe për shkelje masive të kufirit.

Ushtria izraelite tha se po përpiqet të ndalë njerëzit, që përmes djegies së gomave apo bombave molotov, tentojnë të çajnë kufirin. Tanket dhe snajperat izraelitë janë në kufi dhe gazi lotsjellës po përdoret për t’i larguar palestinezët nga aty.

Përfaqësues të palestinezëve thanë se Izraeli po përpiqet t’i trembë ata me plumba, por u zotuan se nuk do të falin as edhe një centimetër të tokës palestineze.

Palestinezët kërkojnë prej kohësh të drejtën që të kthehen në tokat e tyre, që tashmë janë brenda shtetit izraelit, por Izraeli thotë se ata duhet të vendosen në një shtet të ardhshëm palestinez në Gaza dhe Bregun Perëndimor.

Shkruar Nga
More from Redaksia

Kryebashkiaku i Vlorës, tender 6.6 mln lekë për një makinë luksoze!

  Nuk kanë fund thagmat e kryebashkiakut të Vlorës, Dritan Lelit, lidhur...
Read More