Këshilla: Ushqimet që luftojnë aciditetin në stomak

Arsyet e hiperprodhimit të aciditetit në stomak janë të ndryshme, nga mënyra e të ushqyerit, konsumi i alkoolit e deri te trashëgimia. Ndaj dhe modifikimi i ushqimit është një ndër hapat kryesorë në kontrollin e aciditetit të stomakut.

Rritja e prodhimit të aciditetit në stomak mund të shkaktojë simptoma të ndryshme si refluks, ndjesi djegieje, fryrje, gromësima, dispepsi, përzierje dhe shije thartire në gojë. Arsyet e hiperprodhimit të aciditetit në stomak janë të ndryshme, nga mënyra e të ushqyerit, konsumi i alkoolit e deri te trashëgimia. Nëse situata zgjat për një kohë të gjatë e patrajtuar, pasojat mund të jenë dramatike pasi qelizat e stomakut fillojnë të humbin aftësinë mbrojtëse ndaj aciditetit. Modifikimi i ushqimit është një ndër hapat kryesorë në kontrollin e aciditetit të stomakut.

Bulmeti

Qumështi është një ndër ushqimet që mund të qetësojë ndjeshëm hiperaciditetin e stomakut, por duhet të jetë pa yndyrë pasi kjo e fundit mund të shkaktojë të kundërtën. Nënproduktet e qumështit (me yndyrë të reduktuar), si kosi dhe djathi, përbëjnë burim të mirë proteinash dhe kalciumi. Për këtë arsye këshillohet të konsumojmë rreth 3 racione çdo ditë bulmet. 1 racion bulmet = 45gr djathë, 200ml kos dhe 240ml qumësht.

Frutat

Frutat të cilët kanë aciditet vetë, si portokallet, kivi, qitrot, limonat, ananasi, luleshtrydhet, duhet të evitohen. Mollët janë ndër frutat që ndihmojnë ndjeshëm në kontrollin e aciditetit, gjithashtu rrushi, dardhët, bananet, pjepri, boronicat dhe pjeshkët, janë fruta të tolerueshme mjaft mirë. Gjithsesi, konsumi i frutave nuk duhet të kalojë sasinë e nevojshme ditore që është deri në 4-5 racione në ditë. 1 racion frutë = përafërsisht 120gr frutë.

Perimet

Përgjithësisht, perimet janë zgjedhje e mirë për një stomak që prodhon aciditet me shumicë, përveç domateve dhe qepëve të cilat, është mirë të evitohen në rastin në fjalë. Zhardhokët si patatet, karotat, rrepat dhe veçanërisht finoku janë mjaft miqësore me stomakun. Lëngu që përftohet nga shtrydhja e lakrës së bardhë, të freskët, është një ndër produktet më të përsosura për rigjenerimin e qelizave të stomakut dhe mbrojtjen e tyre nga aciditeti. Brokoli, mashurkat, lakrat, lulelakra, kungujt, selinoja, përbëjnë një pjesë të rëndësishme të ushqimit të shëndetshëm e të ekuilibruar dhe këshillohet të konsumohen në një sasi prej 200-300gr/ditë.

Drithërat

Përgjithësisht, buka, makaronat, orizi dhe drithërat janë të pranueshme në këtë dietë. Veçanërisht, tërshëra është mjaft e këshillueshme, si dhe drithërat integrale dhe nënproduktet e tyre. Kujdes; mos i ngarkoni gatimet e tyre me salca të yndyrshme apo djathë të pasur në yndyrë. Këto produkte duhet të përbëjnë burimin kryesor të energjisë që nevojitemi në ditë, prandaj përpiquni t’i vendosni në pothuaj të gjitha vaktet tuaja.

Mishi, peshku

Ushqimet në këtë kategori janë të lejueshme, mjafton të mos jenë të pasura në yndyrë, mos të teprohet në sasi dhe të mos gatuhen të skuqura. Preferoni peshkun e kaltër, mishin e bardhë të shpendëve – pa lëkurën, vezët e freskëta, fasulet dhe djathin pa yndyrë, si burim kryesor të proteinave. Mishi i kuq këshillohet 1-2 herë në javë, i gatuar në presion me perime dhe erëza, si rozmarina dhe sherebela.

Pijet

Uji është pija më e përshtatshme për organizmin dhe stomakun sensitiv. Disa çajra si kamomili, finoku dhe xhinxheri rekomandohen për të ulur aciditetin. Pijet që duhet të evitohen janë të gjitha ato që përmbajnë kafeinë, alkool, kakao dhe mente.

Produkte të veçanta

Uthulla e mollës, edhe pse tepër acide vetë, rezulton në përmirësim të ph-së së stomakut. Provoni ta vendosni si përbërës të salcave tuaja për sallatat bashkë me vaj ulliri dhe pak mjaltë.

Probiotikët janë mikroorganizma që luajnë rol tepër ushqyes për aparatin tonë tretës dhe si rrjedhojë janë një armë e fortë kundër dispepsisë që mund të pasojë aciditetin e lartë.

 

Lëngu ideal për stomakun

400 gr lakër e bardhë

1 mollë e ëmbël

1 kokërr finok

2 feta të holla xhinxher të freskët

 

Përgatitja:

Shtrydhini perimet të gjitha bashkë dhe konsumojeni lëngun 2 herë në ditë; në mëngjes dhe para gjumit.

 

Mëngjesi ideal për të ulur aciditetin e stomakut

1 kupë qumësht pa yndyrë ose qumësht bajamesh

½ kupë tërshëre

10 bajame

½ molle

Përgatitja:

Vini në zjarr të ulët qumështin me tërshërën deri sa ajo të zbutet. (Mos lejoni të ziej qumështi).

Thërrmoni bajamet dhe i hidhni të qumështi.

Copëtoni mollën dhe e shtoni përsipër.

E konsumoni të ngrohtë.

Burimi: Blerina Bombaj, dietologe klinike

Shkruar Nga
More from Enton Palushi

PUNK dhe EHO

-Letërkëmbimi Mapo-Danas Nga Zoran Panoviq I dashur Mustafë, Urrejtja serbo-shqiptare ka episode...
Read More